Über uns

Wer sind wir

Wir trommeln (in Basel «ruessen» genannt) jeweils am Basler Fasnachts-Dienstag vom morgen früh bis in die Morgenstunden vom Fasnachts-Mittwoch. Wir trommeln traditionell mit Basler Trommeln und Raaben - in Basel Gwäägi genannt - Kostümen. Der Vortrab läuft traditionell in rot, der Tambourmajor in gelb und die Drumline in schwarz.

Gwäägi 1976 bestehen derzeit aus Tambouren folgender Basler Fasnachts-Cliquen:

Entstehung

Kalt isches gsi, gruusig, der Wind het der Rääge duur d Gasse paitschd, d Stroosseladäärne hän geege d Dunggelhait aakämpfd und numme no e mieds Liecht uffen Asphalt gworfe. Ainsam isches gsi säl Mool in de Basler Gasse und ruehig. Usser der Rääge wo unermiedlig geege der Huet oder der Räägeschirm dropfd het, wo vom Bode uffegschbritzt isch und dy vo undehäär au no nass gmacht het, isch sälbetzmool nit vyyl los gsi in der Basler Innerstadt. In däre unfrindlige Umgääbig sin 3 Schnäuz unerschrogge richtig Rest. Mäggd gloffe um bimene hailige Glas Bier Ihri Absicht z unterstryche, d Basler Drummelwält neu uffzmische.

Im Novämber 1975 isch im besagte Rest. Mäggd. d Dammbuuregrubbe GWÄÄGI grinded worde, e uss Basler Sicht histoorische Dag. Am Fasnachts Zischdig will me mitenander dur d Gasse ruesse und alles was bishär bekannt gsi isch an d Wand stelle. (Das sell schynts die Fasnacht gsi sy wo d Ueli pausiert hänn vor lutter Angschd was denn do kunnt ...). Und so isches denne ko, dass am Fasnachts Zischdig im Joor 1976 d Gwäägi s erschd Mol duur d Basler Gasse gruessd sin. Sälbetsmol hesch ebbe no am Zischdig kenne dur d Basler Innerstadt gässle, isch doch d Fasnacht am Zischdig noonig in däm Ussmass wie hyt abgloffe. Und was no vyyl wichtiger isch, es het no Baize gäh in dääre vergangene Epoche. Nit numme Kebabs und Tscheesburger.

Aber zrugg zem Wääsentliche. Der Rolf Laufer, Walti Oppliger und Mario Wohlfahrt sin die drey gschichtsdrächtige Persoone gsi ,wo der Fasnachtszischdig uffe Kopf gstelld hän. Drey Dammbuure sin als Gwäägi gloffe. Das isch der Aafang gsi vonnere unglaublige Erfolggschicht vo deene gfääderte Veegel wo bishäär unerraicht isch.

Das wär aigendlig scho e gueti Grindigsgschichd, duet aber nit der Wohret entspräche. Dorum do d Gschicht wies ebbe gsi isch. Aber das isch au nit vyyl schlächter. Im vorige Joorhundert hänn die Aagfrässene am Fasnachtszischdig gschlosse der ganz Daag Fasnacht gmacht. Es isch denn amme eso gsi dass es langi Pausene gäh het ( hejo meh het schliesslig der Cortége nit miesse laufe).Es het sälbetsmool scho Dammbuure gäh wo lieber gruesst hänn anstatt sich in de Baize mit Bier oder Wyy oder Gintonic d Biire voll z schitte.

Drey Drummler, der Rolf Laufer, Mario Wohlfahrt und Walti Oppliger, sin in dääne lange Pause immer zämme go ruesse. Das isch scho anno ninzähhundertainesiebzig so gsi. Zwischedryy het sich der Luc Bourchvoi deene drey aagschlosse. So im Joor 1974 isch der Peter Bauer als Vordrääbler zue Ihne gstosse. Immerno sinn die jetzd fimpf in de grosse Pause zämme uff d Gass.

Im Joor des Herrn 1975 sin die fimpf s erschd mool mittemene gfäädrete Gossdym ummegloffe. Und was ganz wichtig isch, nimm in de Pause sondern der ganzi Dag. S Gossdym isch e Yyberglaid gsi, an das het me Butzfääde gnait, so quasi frisch gschlipfdi Veegeli, d Larve isch die glyychi gsi wie hytte aifach mittemene Filzhuet oobedruff.

Im Joor 1976 sin immer no die glyyche Fimpf im hyttige Gwäägi Gossdym dur d Basler Gasse gruesst. D Gwäägi sin offiziell gebore gsi ...

Unser Repertoire

Gemäss aktuellem Stand «ruesse» (trommeln) wir:

  • Celanesen
  • Windschdi
  • Drummler
  • Gwäägi (*)
  • Retraite
  • Walliser
  • dr Strossewischer (*)
  • Düsefäger
  • Ueli
  • Pumperniggel
  • dr Graiedanz (*)
  • Mätzli
  • Neue Basler Tagwacht
  • Dr grien Hund
  • Faschtewaje

Folgende Märsche sind derzeit parkiert:

  • Parade Marsch
  • Concorde
  • Donnervogel (*)

Märsche mit einem Stern (*) sind Eigenkompositionen.